Бүгінде компанияның қарамағында шамамен 8,4 мың шақырым әуе және кабельдік электр беру желілері мен 255 қосалқы станция бар. Өңірдің энергетикалық инфрақұрылымының едәуір бөлігі 1960–1980 жылдары салынған. Сондықтан соңғы жылдардағы негізгі міндеттердің бірі — нормативтік қызмет мерзімін өтеген жабдықтарды кезең-кезеңімен жаңарту.

Тек 2025 жылы Қостанай облысында инвестициялық бағдарламаны іске асыруға 2,612 млрд теңге бағытталды. Оның жартысынан астамы — 1,384 млрд теңге — қосалқы станцияларды қайта жаңғыртуға, тағы 633,6 млн теңге электр беру желілерін жаңартуға жұмсалды.

Журналистер атқарылған жұмыстың нәтижесін бірден үш нысанда көре алды.

Бағыттың алғашқы нүктесі Қостанай ауданының Айсары ауылындағы «Глазуновка» 35/10 кВ қосалқы станциясы болды. Нысан 1973 жылдан бері жұмыс істейді. Мұнда 10 кВ ұяшықтары мен екі 35/10 кВ күштік трансформатор толық ауыстырылды. Құны 268,4 млн теңгені құраған қайта жаңғырту қосалқы станцияның қуатын арттыруға және жабдықтардың тозуын 55,6%-ға төмендетуге мүмкіндік берді.

Одан кейін пресс-тур қатысушылары Федоров ауданына — «Чеховка – Чистый Чандак – Мирная» 35 кВ электр беру желісіне барды. Бұл желі 1968 жылы пайдалануға берілген. Ұзындығы 14,1 шақырым учаскеде тозған тіректер мен сымдар ауыстырылды. Желіні жаңғыртуға 136,6 млн теңге жұмсалды. Қайта жаңғырту электрмен жабдықтау сенімділігін арттырумен қатар, жаңа жүктемелерді, соның ішінде аудандағы сүт-тауар фермаларын қосу үшін желінің өткізу қабілетін ұлғайтуға мүмкіндік берді.

Бағыт Қостанай қаласындағы жарты ғасырдан астам тарихы бар «Заводская» 35/10/6 кВ қосалқы станциясында аяқталды. Мұнда ескі күштік трансформаторлар жаңа әрі қуатты трансформаторларға ауыстырылды. Бұл қосалқы станциядан облыс орталығындағы әлеуметтік маңызы бар және коммуналдық нысандар да электр энергиясын алатынын ескерсек, атқарылған жұмыстың маңызы ерекше.

Инвестициялық бағдарламаның ауқымды сандарының артында энергетиктердің күнделікті еңбегі тұр.